Wilujeng Boboran Siam 1434 H

Lamun urang ngarasa bungah ku datangna bulan romadhon, tangtu waktu sabulan téh bakal karasa kacida singgetna. Mun diibaratkeun, bulan romadhon téh keur oléng pangantén, mangsana honeymoon jeung amal sholéh, keur meujeuhna geugeut, ngeukeupan kawajiban, ngarangkulan pasunatan.

Pikeun jiwa-jiwa romantis, anu dina jero dadana kebek ku cinta nu sajati, najan waktu terus maju, najan hirup rumah tangga geus mangtaun-taun malahan geus mangpuluh-puluh taun, tinangtu karasana masih kawas keur anyar papangantén, tetep deudeuh, tetep nyaah, teu bosen-bosen silih rangkul ku kaasih, sebutan ka nu jadi pasangan ge tetep darling, honey, ayang...

Kitu deui pikeun jiwa-jiwa romantis, anu dina dadana kebek ku iman jeung taqwa, najan bulan romadhon geus lekasan, ganti ku syawal jeung saterusna, karasana téh bakal kawas romadhon kénéh, bakal tetep geugeut kana amal sholéh, sumanget nohonan kawajiban tur ngalakonan pasunatan...

Parandéné kitu, urang kudu boga kakarén romadhon dina bulan-bulan séjénna. Kabiasaan-kabiasaan hadé nu biasa dipilampah dina bulan romadhon, kawas tadarus, qiyamul lail, i'tikaf, jeung sajabana tetep ku urang kudu diteruskeun malah leuwih ditingkatkeun dina bulan anu séjénna.

Hayu urang jadi jiwa-jiwa nu romantis dina cinta jeung romantis dina agama...

Wilujeng boboran siam 1434 H, mugia jembar pangapunten kana samudaya kalelelepatan lan kaluluputan lahir miwah batin.....