#Fikmin "PAREBUT KABOGOH"

"Awas siah mun kumawani ngadeukeutan deui si Dési!" Junéd
hahaok. "Kumaha déwék wé! Mémangna manéh naonana?" Engkos
teu éléh poporongos.
"Déwék kabogohna!" Junéd nepak dada, jegoh batuk.
"Komo déwék mah calon salakina!" Engkos ngajebian.
Serenteng. Jekok, Junéd nonjok cukang irung Engkos.
Ngabangkieung. Getih ngaley tina liang irungna.
"Hahaha...!" Junéd ngagakgak.
Séak, Engkos najong beuteung Junéd nu keur seuri lelenggakan.
"Hek...!" Junéd nyerengid. Borolo, tina sungutna utah génjér.
Tungtungna mah garalungan. Silih peupeuh, silih dengkék.
Calana ludag-ladig, baju sararoék. Eureun-eureun sanggeus
duanana carapéeun, ngalalempréh sisi jalan.
Keur kitu, lar aya motor Ninja ngaliwat. Kenalpotna
gegerungan. Nincak cileungcang nu nguyumbang, nepi ka
muncrat kana beungeut maranéhanana. Ambek. Tapi geus teu
walakaya, béakeun tanaga. Tibang wasa marelong Dési nu
nangkod diboncéng ku Frédi.